Aai Retire Hotey (आई रिटायर होतेय)-Ashok Patole Marathi Book katha-kadambari (Novel)

आई रिटायर होतेय

अशोक पाटोळे

“हजारो वर्षांपासून कर्तव्याची भूल देऊन पुरुषप्रधान समाजाने स्त्रीला राबवून घेतलेलं आहे. स्वतःच्या सुखासाठी, स्वतःच्या स्वार्थासाठी. जगातलं असं कोणतं हलक्या प्रतीचं काम आहे की जे पुरुषांनी स्त्रीवर ढकललेलं नाही. आणि ही सगळी कामं तिने कळायला लागल्यापासून ते मरेपर्यंत अव्याहतपणे करत राहायची. तुम्ही मात्र पंचावन, साठाव्या वर्षी रिटायर होऊन निवृत्तीनंतरचा आराम उपभोगायचा. पुरुषांच्या एक विशाल समाजाने स्त्रीवर केलेला हा घोर अन्याय आहे. हे बघा! मी ह्या क्षणी स्वतःकडे एक स्त्री म्हणून बघतेय. तुमचंही लक्ष मी माझ्याकडे म्हणजे एका स्त्रीकडे वेधतेय. विसरा की मी तुमची आई आहे की सासू आहे, की बायको आहे आणि सेवा करून करून पार कायापालट झालेल्या पन्नास वर्षांपूर्वीच्या एका सात-आठ वर्षांच्या मुलीकडे बघा. ही भातुकली खेळता खेळता मोलकरीण कधी झाली तिला कळलंच नाही.

आज मी मला समोर ठेवून बघतेय आणि मला दिसतेय हजारो वर्षे अन्यायात खितपत पडलेली एक गुलाम स्त्री मुलगी ह्या नावाने समाजाने विकत घेतलेली आणि म्हातारी म्हणून अडगळीत फेकलेली एक स्त्री तिच्यावरच्या अन्यायाने माझं मन आता पेटून उठलंय. आता मी कुणाची आई नाही, कुणाची बायको नाही की कुणाची आजी नाही. मी फक्त एक स्त्री आहे आणि माझ्या न्याय्य हक्कासाठी एक महिन्याने मी रिटायर होणार आहे. ह्यात एका अक्षराचाही बदल होणार नाही.”