Zen (झेन)-Nitin Bharat Wagh Marathi Book katha-kadambari (Novel) New Era

Zen (झेन)-Nitin Bharat Wagh Marathi Book katha-kadambari (Novel)

प्रस्तावना

विलक्षण वैचारिक गुंतागुंतीच्या मानसिकतेत झेनपर्यंत माझा प्रवास झालेला आहे. ‘जे आहे ते’ सगळं जाणून घेण्याच्या प्रयत्नात, विचारांचं आणि बदलत्या जगाच्या गतीचं प्रमाण सतत व्यस्त राहिलेलं आहे. एक व्यक्ती दोन भिन्न व्यक्तिमत्त्वांसकट, दोन भिन्न जगांत जगत असतानाच्या कोलाहलात, दमवणाऱ्या प्रवासात विसाव्याला गार सावलीचं झाड यावं, तसा काहीसा प्रकार झेनच्या बाबतीत झाला. दोन भिन्न व्यक्तिमत्त्वे यासाठी की आंतरिक जगणं आणि बाह्य जगणं या गोष्टी एकच नसतात. आपल्या मानसिक अवकाशात जे जगणं असतं, ते बाह्य अवकाशाशी मेळ खातंच असं नाही; जसा एखादा गर्दीतही एकटा असतो. त्याप्रमाणे जगण्याचा, व्यवस्थेतील मूल्यांचा आणि वास्तवाचा काहीच संबंध नाही, अशी आजच्या जगाची जगण्याची रीत. नैतिक मूल्यांना महत्त्व द्यायचंच नाहीये, तर मग ती असण्याचा फार्स का करायचा? नियम पाळायचेच नाहीयेत, तर मग नियम बनवायचेच कशाला ? सगळं जगणंच दांभिक असतं की काय, हे आणि असे अनेक प्रश्न. भोवताली नेमकं काय चाललंय? काय दिलं जातंय, काय घेतलं जातंय? काय लादलं जातंय, काय बळजबरीने काढून घेतलं जातंय आणि या सगळ्या आवर्तात आपल्याला स्वतःला काय हवंय? या महत्त्वाच्या अंतस्थ प्रश्नाला टाळून आतबट्ट्याचा व्यवहार बाह्य जगाशी सुरू असतो. या अंतद्वंद्वात स्वतःच्या अस्तित्वाविषयी, असण्या-नसण्याविषयी (being and nothingness) पडणारे प्रश्न. जगण्यातील, तत्त्वज्ञानांतील, दर्शनशास्त्रांतील विरोधाभास. एकूण काय तर मानसिक स्तरावर होणारी छळणूक. अनुभवांचा, तत्त्वांचा आणि मूल्यांचा मेळ बसेल असं काहीच नाही. सर्वत्र जीवघेणी स्पर्धा. कशाची, कशासाठी, काहीच थांगपत्ता नाही. कोण कशाच्या मागे पळतोय, कशाचा पाठलाग करतोय हे समजण्याइतका, समजून घेण्याइतकाही वेळ नाही. एक पळतोय म्हणून दुसरा, मग तिसरा, मग सारा कारवाँ धावतोय. अशा रॅटरेसमध्ये स्वतःला कुठे बसवायचं ?

Available at Ksagar Book Centre  on www. ksagaronline.com

 call on 9545567862 /02024453065