Vadanchi Vadale (वादांची वादळे)-A. H. Salunkhe Marathi Book katha-kadambari (Novel) Lokayat

Vadanchi Vadale (वादांची वादळे)-A. H. Salunkhe Marathi Book katha-kadambari (Novel) Lokayat

मनोगत

‘वादांची वादळे’ हे माझे नवीन पुस्तक मी वाचकांच्या हाती देत आहे. माझे वेगवेगळ्या व्यक्तींशी भारतीय संस्कृतीमधील विविध मुद्यांवर जे वाद झाले, त्यांपैकी काही मोजके वाद या पुस्तकात अंतर्भूत केले आहेत. वरवर पाहता हे व्यक्ती-व्यक्तींमधील वाद आहेत असे वाटले, तरी बहुतेक वेळा प्रत्यक्षात ही दोन भूमिकांमधील लढाई आहे, दोन स्वतंत्र संस्कृतींमधील युद्ध आहे. पुस्तकातील विवेचनावरून हे स्पष्ट होईलच.

तसे बघितले, तर वाद घालणे हा माझा स्वभाव नाही. संघर्षापासून चार हात दूर राहुह्न शांतपणे, प्रसन्नपणे जीवनाचा आस्वाद घ्यावा, हाच माझा खरा पिंड आहे. आज मी रुक्ष आणि किचकट अशा वादात अडकलेलो दिसत असलो, तरी मूलतः ललित कला, गणित, पाणिनीच्या व्याकरणातील सूक्ष्मातिसूक्ष्म प्रतिभा, निसर्गसौंदर्य, निवडक व्यक्तींच्या सहवासातील आनंद अशा गोष्टींमध्ये तल्लीन होऊन जाणे, हाच माझ्या चित्तवृत्तीचा गुणधर्म होता आणि आजही आहे. संघर्षात उतरणाऱ्या माणसाला हे सगळे बऱ्याच प्रमाणात गमवावे लागते आणि त्याला त्याचे आपल्या हृदयाचा लचका तोडल्यासारखे दुःख होते, यात शंका नाही. हे दुःख मी दीर्घकाळपर्यंत अनुभवत आलो आहे.

असे असूनही गेले सुमारे पावशतक मी सातत्याने कुठल्या तरी वादाच्या वादळामध्ये अडकलेलो आहे, असेच चित्र दिसते. वरवर पाहता ही फार मोठी विसंगती आहे. अर्थात या विसंगतीमागे एक महत्त्वाचे कारण आहे. संघर्ष अजिबात आवडत नाही, ही अगदी सुस्पष्ट वस्तुस्थिती आहे. पण संघर्ष टाळल्यामुळे मिळणारी शांती आपल्या स्वातंत्र्याची व स्वाभिमानाची किंमत मोजल्यावरच मिळणार असेल, तर मात्र संघर्ष टाळण्याऐवजी त्याला भिडायचे, अशी माझी वृत्ती आहे. भारताची धार्मिक सांस्कृतिक – सामाजिक व्यवस्था अशी आहे, की येथे आपले स्वातंत्र्य केवळ मिळवण्यासाठीही संघर्ष करण्याखेरीज गत्यंतर नाही. मग ते स्वातंत्र्य टिकविण्यासाठी व त्याचा आनंद घेण्यासाठी संघर्ष करावा लागणे, हे तर अटळच आहे. स्वाभाविकच, अगदी नाइलाज म्हणून मला अनेक वादांत उतरावे लागले आहे. त्याचा परिणाम म्हणून नाना प्रकारे अपमानही सहन करावे लागलेत; एका मोठ्या विद्वानाने तर ‘साळुंख्यांचे डोके बिघडले आहे’ असे म्हणून माझा युक्तिवाद उडवून लावला आहे. बरोबरच आहे. गेली तीन-चार हजार वर्षे ते जे काही म्हणत आलेत, त्याला संमती देऊन मी त्यांच्यापुढे माझे डोके झुकवले, तर माझे ते डोके शाबूत म्हटले जाणार आणि मी ते झुकवण्याऐवजी ताठ ठेवले, की ते बिघडले असल्याची घोषणा केली जाणार !

Available at Ksagar Book Centre  on www. ksagaronline.com

 call on 9545567862 /02024453065