Soviet Samrajyacha Uday Ani Asta Khand 4 ( सोव्हिएत साम्राज्याचा उदय आणि अस्त खंड ४)-Govind Talwalkar-Marathi (novel) Book katha-kadambari

विसाव्या शतकात अवघ्या जगाच्या राजकीय, आर्थिक, सामाजिक सांस्कृतिक आणि महत्त्वाचे म्हणजे वैचारिक जीवनावर मोठा प्रभाव पाडणारी घटना म्हणजे रशियातील बोल्शेविक क्रांती. लेनिनच्या नेतृत्वाखाली झालेल्या या क्रांतीने रशियावर व त्याच्या साम्राज्यावर तीनशे वर्षे चालू असलेली झारशाही संपुष्टात आणली, इतकेच नव्हे तर वेगवेगळ्या देशांत तोवर प्रतिष्ठित असलेल्या राजकीय, आर्थिक-औद्योगिक व सामाजिक व्यवस्थांना आणि त्यांमागील वैचारिक भूमिकांना कमीअधिक हादरे दिले. शोषणमुक्त, शांततामय, न्यायी, स्वतंत्र व सर्वांगीण समतेवर सुप्रतिष्ठित असे नवे युग निर्माण करण्याची स्वप्ने पाहणाऱ्या क्रांतिप्रवण चळवळींना प्रेरणा व उमेद दिली.

लेनिननंतर स्टालिनच्या कारकिर्दीत रशियातील सोव्हिएत राज्याचे साम्राज्य झाले. दुसऱ्या महायुद्धातील देदीप्यमान विजयाबरोबर त्याचा पूर्व युरोपात विस्तार झाला आणि शास्त्रीय व तांत्रिक प्रगतीच्या आधारे सोव्हिएत यूनियन ही एक अण्वस्त्रसज्ज लष्करी महासत्ता बनली. दरम्यान क्रांतीच्या मार्क्सप्रणीत तत्त्वज्ञानात अभिप्रेत असलेल्या कामगारांच्या राज्याऐवजी कम्युनिस्ट पक्षाची, त्यातही पक्षाच्या श्रेष्ठ सत्ताधीश नेत्याची हुकूमशाही प्रस्थापित झाली; अपेक्षित आर्थिक व औद्योगिक विकास झाला नाही; क्रांतीने जणू आपली कोट्यवधी मुले खाल्ली: सोव्हिएत व्यवस्था आपल्या भारानेच खचू लागली आणि शेवटी गोर्बाचोंव यांच्या कारकिर्दीत ती विलयाला गेली.

सोव्हिएत साम्राज्याच्या सुमारे पाऊणशे वर्षांच्या या इतिहासाचा, ज्येष्ठ संपादक व राजकीय अभ्यासक गोविंद तळवलकर यांनी चिकित्सक नजरेने प्रस्तुत चार खंडांच्या ग्रंथात तपशीलवार मागोवा घेतला आहे. त्यांच्या विस्तृत वाचनाचा, विश्लेषक ऐतिहासिक दृष्टीचा आणि सुबोध, रोबक व डौलदार भाषाशैलीचा प्रत्यय त्याच्या पानापानांत येतो. त्यांच्या ‘सत्तांतर’ या त्रिखंडात्मक ग्रंथाप्रमाणेच ‘सोव्हिएत साम्राज्याचा उदय आणि अस्त’ हा बृहदग्रंथही मराठीतील वैचारिक वाङ्मयात प्रथम श्रेणीचे स्थान मिळवून राहील.

Available at Ksagar Book Centre or on www. ksagaronline.com

or call on 9545567862 /02024453065