Pu. La. Ani Mi (पु ल आणि मी)-N.D. Mahanor Marathi Book katha-kadambari (Novel) Samakaleen

Pu. La. Ani Mi (पु ल आणि मी)-N.D. Mahanor Marathi Book katha-kadambari (Novel) Samakaleen

दोन शब्द

▶ महाराष्ट्राचे व जगभरातल्या मराठी भाषिकांचे लाडके पु.ल. देशपांडे १२ जून २००० यादिवशी आपल्याला सोडून गेले.

पुढे अनेक दिवस वृत्तपत्रं, मासिकं, साप्ताहिकं, इतर प्रसिद्धीमाध्यमं भाईंसंबंधी लिहित होती. दूरदर्शन व वेगवेगळ्या वाहिन्यांवरून त्यांच्या चित्रफिती दाखवल्या जात होत्या. त्यांतून त्यांची नाटकं, चित्रपट, साहित्य यांसंबंधी बरंच काही पुन्हा एकदा रसिकांसमोर आलं. तरीही भाई दशांगुळे उरलेलेच होते.

त्या काळात भाईंसंबंधी मी लिहावं असं बऱ्याच लोकांनी सांगूनही मी लिहिलं नाही. इतक्या झटपट मला ते शक्यही नव्हतं. त्यांच्या माझ्या सहवासातल्या काही आठवणी तरी लिहाव्या, त्यांतून रसिकांना माहीत नसलेले भाई, वेगळे भाई दिसतील, म्हणून अनेक मित्रांचा पुनःपुन्हा आग्रह होत गेला. मला अडचण एवढीच वाटत होती, की त्यांच्या माझ्या सहवासातल्या आठवणी लिहिताना माझ्याकडच्याच काही घटना-प्रसंग व माझ्यासंबंधीही लिहावं लागलं असतं. म्हणून मी लिहायला तयार होत नव्हतो; परंतु त्याआधीच आलेल्या माझ्या ‘यशवंतराव चव्हाण’ या पुस्तकात असेच व्यक्तिगत अनुभव, आठवणी व सहवासाबद्दल लिहिलेलं होतं. ते पुस्तक केवळ तेवढ्यासाठीच लोकांना आवडलं होतं.

असं खूप लोकांनी सांगितल्यावर मी भाईसंबंधी थोडंफार लिहायचं ठरवलं. माझा मित्र चंद्रकांत पाटील याचं मला ऐकावं लागलं. भाईंसंबंधी लिहिणं तसं फार अवघड आहे. लिहिताना खूप काही राहून गेलं असेल, नीट सांगता आलं नसेल, पुस्तकात भाई पुरेपूर दिसत नसतील, तर ती माझी मर्यादा आहे, हे मी मान्य करतो. माझं मोठं आजारपण व ऑपरेशन झाल्यापासून विस्मरणही वाढलेलं होतं. तरीही मी जेवढं आठवलं तेवढं लिहिण्याचा प्रयत्न केलेला आहे.

माझे मित्र प्रा. निशिकांत ठकार यांनी भाईंसंबंधी बरंच वेगळं, नवं लिहिलेलं मी नुकतंच वाचलं होतं. त्यांना पुन्हा या लहानशा पुस्तकासाठी थोडं लिहिण्याची विनंती केली. त्यांनी ती मान्य केली. चंद्रकांत पाटील व दादा नेवे यांनीही या पुस्तकासाठी बरीच मदत केली. यातले काही संदर्भ असलेली छायाचित्रं ज्यांच्याजवळ होती, त्यांनी ती दिली. त्या सगळ्यांचे खूप आभार. दररोज शेतकऱ्यांच्या व मित्रांच्या सतत गर्दीत राहणाऱ्या व आळशीपणा वाढलेल्या मला हे लिहिण्यासाठी एका अज्ञात ठिकाणी एकट्याला पाच दिवस बंद करून ठेवणाऱ्या अशोक भवरलाल जैन या माझ्या मित्राचे खूप खूप आभार.

ना. धों. महानोर

Available at Ksagar Book Centre  on www. ksagaronline.com

 call on 9545567862 /02024453065