Loksatta Anyatha (लोकसत्ता अन्यथा)-Girish Kuber

Loksatta Anyatha (लोकसत्ता अन्यथा)-Girish Kuber

‘संपादकाने दैनंदिन संपादकीय अग्रलेखांव्यतिरिक्त स्वतःच्या नावाने एक तरी सदर लिहायलाच हवे’ हा आग्रह माझा तत्कालीन सहकारी मित्र प्रवीण टोकेकर आणि नंतर दै. लोकसत्ताच्या संपादकीय पानांची जबाबदारी हाताळणारा दुसरा मित्र /सहकारी अभिजित ताम्हणे या दोघांचा! ‘अग्रलेखाद्वारे हाताळता न येणाऱ्या, तरी हाताळायला हव्यात अशा अनेक विषयांवर त्यामुळे भाष्य करता येते’ ही यामागची भूमिका. तसेच या निमित्ताने वेगळ्या शैलीचाही प्रयोग करता येतो, हे त्यांचे म्हणणे मलाही पटले. त्यातूनच २०११च्या १ जानेवारीस या सदराचा जन्म झाला. त्याचे ‘अन्यथा’ हे समर्पक शीर्षक प्रवीणचेच.

सुरुवातीला दर शनिवारी आणि नंतर व्याप खूपच वाढल्यानंतर एकाआड एक शनिवार असा या सदराचा दिवस ठरला. ‘त्या आठवड्यातील काही वेचक जागतिक घडामोडी, वेगळ्या देशांतर्गत घटना वा अन्य असे काही निर्णय आदींची दखल घेत त्यांचा आपल्या जगण्याशी असलेला संबंध उलगडून दाखवणे’ हे या सदराचे सूत्र होते, आणि अजूनही आहे. आसपास इतके काही घडत असते आणि तरीही त्याकडे माध्यमांचेही दुर्लक्ष होत असते. अशा घटना हेरण्याचा छंदच या सदराने लावला. एका अर्थी हे सदर म्हणजे माझ्याही निरंतर शिक्षणाची सोय होती. त्याबद्दल या दोघांचे आभार !

या सदास एक वर्ष झाल्यापासून त्याच्या पुस्तकाची सूचना काही प्रकाशकांकडून आली. काही ना काही कारणाने ते लांबत गेले. अखेर मुकुंद संगोराम, ब्रँड महाव्यवस्थापक सुपर्णा नायक, मकरंद पाटील, पुस्तकाचे मुखपृष्ठ तयार करणारे प्रसाद खेतमर आणि दै. लोकसत्ता ग्रंथमालेचे प्रकाशक भागीदार दत्तात्रेय पाष्टे यांच्या रेट्याने ते आकारास येत आहे. यात अर्थातच सर्वच्या सर्व स्तंभांचा अंतर्भाव नाही; तसे करणे योग्यही ठरले नसते. कारण काही विषय अगदीच तात्कालिक असतात. त्यामुळे या तत्कालिकतेच्या मर्यादा ओलांडून टिकणाऱ्या विषयांनाच पुस्तकात स्थान देण्याचा प्रयत्न आहे.

Available at Ksagar Book Centre or on

www. ksagaronline.com or call on 9545567862 /02024453065