Char Shabd (चार शब्द)-P.L.Deshpande Marathi Book katha-kadambari (Novel)

Char Shabd (चार शब्द)-P.L.Deshpande Marathi Book katha-kadambari (Novel)

‘चार शब्दां’ विषयी चार शब्द

एखादी घटना, एखादा अनुभव किंवा एखादी साहित्यनिर्मिती मला आवडली की दुसऱ्या कुणाला तरी त्याबद्दल सांगून, त्याविषयी लिहून, इतरांना त्या आनंदात सामील करून घ्यावे, ह्याची माझ्या मनाला ओढ लागते. मग ती घटना कुठल्याही क्षेत्रांतली असो नाही तर विषयांतली असो. एखादे चांगले पुस्तक वाचले, चांगली कविता वाचली किंवा चांगल्या गाण्याची मैफल जमून गेलेली पाहिली की, तिच्याविषयी बोलायचा किंवा लिहायचा मला अनावर मोह होतो. ‘चार शब्द’ ह्या संग्रहातील या प्रस्तावनादेखील माझ्या स्वभावातल्या ह्या अनावर मोहापोटीच निर्माण झालेल्या आहेत. गेली पन्नासएक वर्षे कलानिर्मितीच्या निरनिराळ्या क्षेत्रांत मला वावरायला मिळाले. ह्या काळात मी लिहिलेल्या या प्रस्तावना आहेत. मात्र ह्या प्रस्तावना म्हणजे एखाद्याच्या लेखनातले गुणदोष दाखवणारे चिकित्सक समीक्षण नाही. मला आवडलेल्या पुस्तकांचे आस्वादकाच्या भूमिकेतून केलेले हे स्वागत आहे. मीच एका ठिकाणी ह्या प्रस्तावनांना ‘स्वागतपर गद्य’ असे म्हटले आहे. ह्यामागे, स्वतःच्या लेखनाने ज्यांनी आपल्याला आनंद दिला, त्या लेखकांविषयीची कृतज्ञतेची भावना आहे. सुंदर कलाकृती वाचकाचे, श्रोत्याचे किंवा प्रेक्षकाचे जीवन अधिक सुंदर करून जाते. माझ्या सुदैवाने, अचानक धनलाभ व्हावा तशी ही पुस्तके मला वाचायला मिळाली. ह्या प्रस्तावना लिहिण्याचा मुख्य हेतू, निरनिराळ्या पुस्तकांकडे वाचकांचे लक्ष जावे हाच आहे.

प्रा० मं० वि० राजाध्यक्षांनी प्रस्तावनालेखनाचे आणि लेखकांचेही एक मजेदार वर्गीकरण केले आहे. त्यात स्वतः लिहिलेल्या प्रस्तावनासंग्रहाला आपणच आपली प्रस्तावना जोडण्याचा प्रकार त्यांनी घेतलेला नाही. कदाचित हा प्रमाद यापूर्वी कुणाच्या हातून घडलेला नसावा. हे म्हणजे आपल्या स्वागताला आपणच दारात उभे राहण्यासारखे आहे.

श्री० पु० भागवतांनी हा संग्रह छापून प्रकाशित करायचे ठरवले. त्यांचा आणि श्रीनिवास कुलकर्णी यांचा मी आभारी आहे.

– पु० ल० देशपांडे

Available at Ksagar Book Centre  on www. ksagaronline.com

 call on 9545567862 /02024453065