Chandanyat Bhijayacha Rahun Jau Naye Mhanun (चांदण्यात भिजायचं राहून जाऊ नये म्हणून)-A. H. Salunkhe Marathi Book katha-kadambari (Novel) Lokayat

Chandanyat Bhijayacha Rahun Jau Naye Mhanun (चांदण्यात भिजायचं राहून जाऊ नये म्हणून)-A. H. Salunkhe Marathi Book katha-kadambari (Novel) Lokayat

मनोगत

‘चांदण्यात भिजायचं राहून जाऊ नये, म्हणून !’, हे माझं नवं पुस्तक वाचकांच्या हाती देताना मला विशेष आनंद होत आहे. खरं तर या पुस्तकाला ‘छोट्या गोष्टी. मोठ्या गोष्टी’ असं काही तरी नाव द्यावं, असं आधी माझ्या मनात होतं. प्रत्यक्षात ते नाव दिलेलं नसलं, तरी पुस्तकाचा आशय तोच आहे. जीवनाच्या प्रवासात मला आलेले छोटे-छोटे अनुभव मी इथं नोंदवले आहेत. पण वरवर पाहता छोट्या वाटणाऱ्या या अनुभवांमधे बरचं काही महत्त्वाचं असं साठवलेलं आहे, अशी माझी भावना आहे. ‘फुलूयाही-फुलवूयाही’ असं शीर्षक द्यावं, असंही मनात आलं होतं. सदर पुस्तकाच्या आशयाच्या दृष्टीनं तेही सुसंगत होतं. कारण, माणसानं आपल्या स्वतःच्या अंतःशक्ती शक्य तितक्या फुलवाव्या आणि इतरांना त्यांच्या तशा प्रकारच्या शक्ती फुलवण्यासाठी साहाय्य करावं, असा या पुस्तकाचा मुख्य आशय आहे.

प्रत्यक्षात जे शीर्षक दिलं आहे, त्यामागं असलेला हेतू स्वयंस्पष्ट आहे, असं मला वाटतं. जीवनाच्या वाटचालीत अनेकदा आपण कमी महत्त्वाच्या गोष्टीमागं धावता धावता जीवन जगण्याचा खराखुरा आनंद मिळवायचंच विसरून जातो. मी स्वतःही याला अपवाद नाही. पण आमच्या चुका आमच्या पुढच्या पिढ्यांनी करू नयेत, म्हणून या पुस्तकाचा खटाटोप केला आहे. मी यापूर्वी विद्रोहाची संकल्पना वारंवार मांडली आहे. या संकल्पनेत एकीकडनं अनिष्ट, अहितकारक अशा गोष्टींचा नकार जरूर आहे, पण त्याबरोबरच दुसरीकडनं निकोप आनंदानं ओसंडणाऱ्या, ताज्या, प्रसन्न गोष्टींची नवनिर्मितीही आहे, असं मात्र मी आग्रहानं सांगत आलो आहे. विद्रोहाचा गाभा केवळ नकाराचा नाही, अनिष्टाच्या नकारातून फुलणाऱ्या सर्जनाचाही आहे. म्हणूनच, अन्याय, शोषण यांच्या विरोधात उठाव करताना नवनिर्मितीच्या प्रसन्न चांदण्यात भिजायलाही आपण विसरू नये, असं मला वाटतंय्.

आ. ह. साळुंखे

Available at Ksagar Book Centre  on www. ksagaronline.com

 call on 9545567862 /02024453065