Anunad (अनुनाद)-Manjiri Dhamankar Marathi Book katha-kadambari (Novel) Continetal

Anunad (अनुनाद)-Manjiri Dhamankar Marathi Book katha-kadambari (Novel) Continetal

वाचकहो नमस्कार.

घंटेचा टोल पडला किंवा तार छेडली की मागे रेंगाळणारा नाद, त्याबी आस म्हणजे अनुनाद. आपल्या आयुष्यात रोज कित्येक घटना घडत असतात, त्यातल्या काही मागमूसही न ठेवता विरून जातात, पण काहींचा अनुनाद मनात झंकारत राहतो. त्याच अनुनादाला दिलेलं शब्दरूप, म्हणजे माझं हे पाचवं पुस्तक, तुमच्या हाती देताना मन भरून आलंय. अर्थात, ह्याचं श्रेय तुम्हाला. माझी आधीची पुस्तकं प्रेमाने स्वीकारलीत म्हणूनच तर हे लिहायचा हुरूप आला. पण तुम्हाला हे पुस्तक आवडलं तर ते श्रेय मात्र कॉन्टिनेन्टल प्रकाशनाचं, देवयानी अभ्यंकरचं. माझ्या लिखाणावर विश्वास ठेवून, वेळप्रसंगी मागे लागून तिने माझ्या लिखाणाला हे देखणं कोंदण दिलंय. एवढंच नाही तर माझ्या डोक्यातली ऑडिओ बुकची कल्पना बोलून दाखवल्याबरोबर तिने उत्साहाने ती उचलून धरली. आताची तरुण पिढी मराठी फारसं वाचत नाही, पण त्यांना मराठी ऐकायला नक्की आवडतं, म्हणून मग पुस्तकातल्या काही भागाची ऑडिओ सीडी करून ती पुस्तकाबरोबरच द्यायची असं ठरलं. आशुतोष नेर्लेकरांना मार्गदर्शन करण्याची आणि काही लेखांचं वाचन करण्याची विनंती केली. त्यांनी लगेच होकार दिला. आपल्या गोड गळ्याने आणि स्वभावानेही सगळ्यांना जिंकून घेणाऱ्या अनुराधा मराठे उत्तम अभिनेत्रीही आहेत. याचा नुकताच प्रत्यय आला होता. त्याही काही लेख वाचायला आनंदाने तयार झाल्या. काही लेखांमध्ये गाण्यांचे संदर्भ आहेत. ‘भटाला दिली ओसरी भट हातपाय पसरी’ या म्हणीनुसार मी त्यांना ती गाणी गुणगुणाल का विचारल्यावर एका क्षणात हो म्हणाल्या, अगदी उत्साहाने. त्यांच्या गाण्यामुळे सीडीला चार चाँद लागले हे सांगणे नलगे, देवयानी, सचिन भुसारी यांनीही भरपूर मेहनत घेऊन थोडे लेख वाचले आहेत. वाचनाला जरा पार्श्वसंगीताची डूब असेल तर ते अधिक परिणामकारक होतं. पार्श्वसंगीताची आणि रेकॉर्डिंगची जबाबदारी आमोद कुलकर्णीने नेहमीप्रमाणे प्रेमाने आणि चोख पार पाडली. श्राव्य पुस्तकाच्या ह्या अभिनव कल्पनेचे वाचक (की श्रोते?) स्वागत करतील अशी अशा आहे.

माझी मैत्रीण बुक एडिटर आणि पत्रकार जयश्री बोकील हिने या पुस्तकात पाच विभाग भाग करण्याचा मोलाचा सल्ला दिला. ते विभाग आहेत-

१) भान – वरवर साध्या वाटणाऱ्या अनुभवांनी दिलेलं भान

२) सफरचंद- प्रवासातले अनुभव

३) जाते थे जापान – पहुँच गये चीन (विविध व्यक्तींतील संवाद)

४) साधना – ज्येष्ठ कलाकारांची तपश्चर्या

५) वारसा – आई-वडिलांचं ऋण.

चित्रकार अभय जोशी यांच्या कुंचल्यातून साकारलेल्या मुखपृष्ठ आणि मधल्या चित्रांमुळे पुस्तकाच्या देखणेपणात भर पडली आहे. चेतना वडके हिने डी.टी.पी.चं सर्व काम उत्तम प्रकारे केलं.

हा अनुनाद तुमच्याही मनात झंकारत राहील अशी आशा करते.

मंजिरी धामणकर

Available at Ksagar Book Centre  on www. ksagaronline.com

 call on 9545567862 /02024453065