Chakravarti (चक्रवर्ती)-Malati Dandekar Marathi Book katha-kadambari (Novel) Continetal

Chakravarti (चक्रवर्ती)-Malati Dandekar Marathi Book katha-kadambari (Novel) Continetal

प्रस्तावना

चक्रवर्ती ही माझी ऐतिहासिक व्यक्तीवर आधारलेली दुसरी कादंबरी. कादंबरी म्हणजे इतिहास नव्हे आणि ललित लेखक म्हणजे इतिहासकार नाही. ललित कादंबरीचा रथ ऐतिहासिक भूमीवरून अधांतरी चालतो. फक्त त्या भूमीचे त्या रथाच्या गतीला भान असले पाहिजे.

हे भान राखण्याचा यत्न केला आहे हे संदर्भग्रंथांच्या सूचीकडे नजर टाकली की ध्यानात यावे.

चक्रवर्ती अशोकाच्या दीर्घ कारकीर्दीत राष्ट्राच्या राजकारणात किंवा सामाजिक जीवनातही अनेक बदल झाले, अनेक संक्रमणांचा पाया घातला गेला; अशोकाच्या व्यक्तिगत वैचारिक भूमिकेतही असेच मूलगामी परिवर्तन होत गेले. या दोन्हींचा आलेख एकाच वेळी या कादंबरीत आला पाहिजे ह्याची जाणीव मला हे पुस्तक लिहिताना सतत होती. ह्या परिवर्तनापाठीमागे असलेल्या तत्कालीन अनेक व्यक्तींच्या प्रेरणांचा मागोवा घेताना मात्र मला इतिहासापेक्षा कल्पनेदरच अधिक विसंबावे लागले. गेली कित्येक वर्षे मी हे कथाबीज मनात घोळवले आहे. सुमारे दहा वर्षांपूर्वी ह्याच कथानकातील काही भागांवर आधारित असलेले ‘महाराणी’ हे नाटक मी लिहिले होते, त्याच वेळेला जाणवले की अशोक ही व्यक्तिरेखा मनस्वी व तरीही गूढ अशी आहे. ही कादंबरी लिहायचा संकल्प तेव्हाच केला होता. ह्या कादंबरीचे यशापयश काही असो, त्या संकल्पाची पूर्ती झाली हेही समाधान थोडेथोडके नाही.

या कादंबरीसाठी अभ्यासावे लागलेले अनेक मराठी संदर्भ ग्रंथ पुणे येथील मुक्तद्वार ग्रंथालय व भारतीय सांस्कृतिक कोश कार्यालय, यांच्या वाचनालयांतून मला मिळाले, तसेच अनेक हिंदी व इंग्रजी संदर्भ ग्रंथ मला जयपूर येथी, राजस्थान विश्वविद्यालयाच्या संपन्न ग्रंथालयातून मिळाले.

वरील सर्व संस्थांची व त्यांच्या ग्रंथपालांची मी अत्यंत आभारी आहे.

माझे प्रकाशक मित्र श्री. अनंतराव कुलकर्णी, कॉन्टिनेन्टल प्रकाशन यांनी अगत्यपूर्वक ही कादंबरी स्वीकारून प्रसिद्ध केली, याबद्दल मी त्यांचेही मनापासून आभार मानते.

कदाचित ही माझी शेवटची कादंबरीही असेल, पण ती लिहिताना मला आनंदाचे अनेक क्षण गवसले. त्यातल्या काही क्षणांची तरी अनुभूती वाचकांना येईल अशी आशा आहे.

Available at Ksagar Book Centre  on www. ksagaronline.com

 call on 9545567862 /02024453065